حكـاية دنـيـا --- فـتـاة يـعيـدها الـزمن إلى عصــر الجواري بقلم ايمان مزيان الحلقة 25
الطبيب كيشوف في دنيا و هي حالا فمها ما فهم والو، البنت جايا مع حماتها باش تعرف راسها واش حاملة و في نفس الوقت خايفة تكون حاملة العجب هذا. ضحك و قاليها (( واش بغيتي تكوني حاملة ولا غير جاية تديري الخاطر لحماتك؟)) دنيا مسكينة حدرات راسها وشدّاتها فقلبها ماعرفات اش تقولليه ولا باش تجاوبو. حبيبة حتى هي تصّمرات مالقات حتى كذبة تطلقها على هاذاك الفضولي و تسكتو بيها بقات غير كتبلّق فيه. الطبيب بانو ليه دبّلو عينيهم و دخلو سوق راسهم هو يقول لدنيا (( هاد الساعة مازال ماكين والو، مالك على هاد الزربة ا بنتي راكي باقة صغيرة)) دنيا ناقزات من بلاصتها بالفرحة، كتضحك حتى بانو ليها ضراس العقل، حبيبة بغات تعنّقها و خافت الطبيب يعيق فرحات فخاطرها ودارت واحد الضحكة سفرة قالت للطبيب ((يجيب الله ماكرهتش نفرح بولاد ولدي))
دنيا ماقدراتش تخبّي فرحتها و في نفس الوقت ماقدراتش تحبس الضحك على السلوگيا اللي طلقات حبيبة على الطبيب، خارجات كيكركرو بزوجات حتى وحدة ما تفكرات السي المختار اللي مجمع في المحل ديال السي حمد، حتى فاتو الشارع عاد عاقو
حبيبة : آويلي ا الصگعة نسينا بّاك
دنيا : ناري عنداك يكون شافنا؟
حبيبة : الى شافنا ما حنا في خير غير قلبّي على باش تفكّيها معاه
دنيا : ناري احبيبة اش غادي نقولو ليه؟
حبيبة : علاش كتشوفي فيا انا؟ بّاك هاداك قولي ليه اللي بغيتي انا جهدي درتو معاك حتال هنا
دنيا : شاما تكون باقا في السوق؟
حبيبة : علاش بغيتي شاما؟ بقات غير هي ما دخلتيهاش تكذب معاك
دنيا : عافاك عيطي ليها الى كانت باقا في السوق تقدّى لينا معاها باش الى كان ماشافناش ما يدّي ما يجيب
حبيبة : ها شاما نعيطو ليها و الى كان سافنا اش نقولو ليه؟
دنيا : قولي ليه نتي ا حبيبة راكي كتعرفي تقنبليها و كتجي معاك
حبيبة : الطّنز هذا؟! درنا فيك وليتي تخشي لينا فيه معيور معيور
دنيا : لا حاشا ا مرات بّا، غير بغيت نقولّيك زعمة درتي خيرك كمّليه
حبيبة : راكي لاقيا علامن تنوعري ا بنت المختار، زيدي قدّامي شيري لشي طاكسي يجمع لينا رجلينا من هنا.
حبيبة قلبها بيض واخا دنيا لسانها طويل و مرة مرّة كتخرج العيب مكاتدّيش عليها. عيّطات ل شاما لقاتها باقا في السوق و طلباتها تقضّى ليهم حتى تجي وتعطيها الفلوس، شاما ماقالتش لا ولكن قتلاتهم بعلاش و كيفاش، هادشي غير في التلفون المصيبة هي من ترجع من السوق، خاصّهم يلقاو باش يسكّتو شاما عاد يشوفو اش يقولو للسي المختار.
شدّو طاكسي صغير و فرفرو للدار قبل ما يسبقهم السي المختار، حبيبة عفريتة غير وصلات و دارت واحد الدّرة و زوج طروف ديال الحامض على راسها و تكّات في القبّة كتنين، دنيا جمعات الشقا و الروينة بازربة و طلقات الما في الدار دارت ليها تسياق قيلني عليك التوجيهة تشعل و القنات الله يهديك. جات شاما قبل السي المختار جابت ليهم التقديا، عطاتها دنبا الفلوس و صدّراتها (( حبيبة مريضة الليل كامل و هي شادّاها الحمّى ياللاه نعسات مسكينة مبغيتش حتى نشقى باش منقرقبش و نفيقها)) شاما خذات الفلوس و قالت لدنيا (( الى احتاجيتي شي حاجة حنا غير في الدار ما يكون عندها باس)). دنيا و حبيبة هاداك النهار الشيطان قالو ليه سير تلعب نتا اش كتعرف بالكذوب
لقراءة الحلقة 24 اضغط هنا حكاية دنيا الحلقة 24
لمتابعة كافة الحلقات من 1 الى 23 اضغط هنا حكاية دنيا فتاة يعيدها الزمن الى ،،،الحلقات من 1 الى 23
حكـاية دنـيـا --- فـتـاة يـعيـدها الـزمن إلى عصــر الجواري بقلم ايمان مزيان -- الحلقات 26/27
ردحذفالرابط من فلك
حذفحكاية زينة تهبل حبيت تكملها ياريت نحطو الحلقات الاخرى و جزاكم الله خير
ردحذف